٢٠١٠/١٢/٠٩

إسطوانة الويكي ليكس المشروخة

يا جماعة مش ممكن ويكي ليكس إل لحس عقل الناس، أنا حاسس شعبولا حايطلع أغنية عن ويكي ليكس هو كمان بالمرة في وسط الزحمة و حايكون كلامها حاجة شبه كده

ريسنا صاغ سليم بشهادة جوليان أسانجي، لا تقولي أوباما و بوش و لا أردوغان الحلانجي، و إيييييييييه

طويطر قال للفيسبوك إقفلوا الويكي ليكس، لاكن إحنا عيال عفاريت ولاد لاذينا و جييكس، و إييييييييييه

الويكيليكس حايجنن اليهود و الأمريكان، على مين يا إبن أسانجي، ده الوطني في البرلمان، و إيييييييييه

الويكي ليكس أنصفنا في وسط العالم كله، و سرب الأخبار ولا قاللي و لا قول له، و إييييييييييييه

أنا فعلا زهقت من العالم كله مهتم بوثائق الويكي ليكس الفكسانة ديه و الدرامة المصاحبة ليها من حبس الواد بتاع الويكي ليكس و قفل السايت و الهاكرز إل هاجموا السايت إل مش بياخد فيزا و الجنان ده كله

٢٠١٠/١٢/٠١

البرلمان، الكيلو بامية هي الحل

يا مصر، أفديكي بروحي و دمي.
يا مصر، خسارة فيكي الواحد يوسخ صوباعة بالحبر بتاع إنتخاباتك.

تجربتي مع أول مرة إنتخاب كانت في غاية الهدوء و كل من في اللجنة من شرطة و مسؤلين كانوا قمة في الأدب و الذوق و التعاون.
نتائج الإنتخابات الأولية لا تعني سوى أن مجلس الشعب القادم سيكون كيس اللب إل حايتسلى عليه كل مخاليق ربنا في كل بقاع الدنيا و هما بيتريقوا على مصر و ديموقراطيتها.

ديموقراطية مصر هي التي جعلت شخص يؤمن بفصل الدين عن الدولة كالعبد لله يصوت للإخوان.
و ديموقراطية مصر هي أيضا التي جعلت الإخوان لا يفوزون بأي من مقاعد البرلمان في بلد معظم سكانة لديهم هوس ديني.

في مصر برلمان يجلس فيه الوزير و رجل الأعمال بجانب العامل و الفلاح.
و في مصر يترشح الوزير و لواء الشرطة بصفته عامل أو فلاح.

بلاها وفد، بلاها محظورة، بلاها وطني، بلاها برلمان.
بلاها إنتخابات و خلوها كيلو بامية.

و لو تصويتنا مش عاجبكوا، قولولنا بدل ما نصوت نشخر