٢٠١٢/١١/٢٧

بطاطساية سخنة إسمها الفلول

دلوقتي كل معسكر بيتهم التاني إن معاه فلول، وده الدليل الأقوي لكل معسكر عشان يثبت إن هو الثورة والباقي لأ.



  الفكرة أيها السادة، إن زي ما حسام الحملاوي قال في ستاتوس نشرتها من شوية، الإستقطاب موجود وحايفضل موجود وكل طرف بيشوف الإستقطام من الجانب الموائم لوجهة نظره ومصالحه .. البعض يراه إسلامي علمان والأخر يراه طبقي إلخ .. وبالتالي توزيعة ثورة وفلول أصلا مش ثابتة على مدار الوقت .. الحكاية مش أهلي وزمالك يعني .. حتى الأهلي والزمالك لاعيبيتهم بيتنقلوا من فريق لفريق.

 هل معني كلامي إن الفلول حلوين دلوقتي وعفا الله عما سلف ومن جق البرادعي وحمدين يتحدوا مع السيد البدوي وأمثاله مثلا؟ طبعا لأ .. وديه خطوة غبية منهم وبتخصم من رصيدهم الأخلاقي .. لكن في المقابل أنا ضد النظرة الشوفينية وإلدعوات المنادية بطرد الفلول من الميدان .. وبالذات كون الإسلامجية هم أكثر من يستخدم لعبة ثورة وفلول دلوقتي.

 في نظري الوضع في مصر دلوقتي أقرب للبنان .. فرقاء سياسيين مرة يتحالفون ومرة يتضادون حسب المصالح .. عايزين نلعبها سياسية، يبقى نفكنا من ثورة وفلول .. عايزين نلعب ثورة وفلول .. يبقى مش حانخلص والكل حايتلط في الأخر.

٢٠١٢/١١/٢٣

المزلقان والإشارة المحمولة

أنا حاليا قاعد في مدينة في إنجلترا، مدينة صغيرة مش لندن، ممكن تقول حاجة كده زي مدن الصعيد بالنسبة لهم .. حاجات كتير طبعا لفتت نظري هنا، فمثلا مافيش ولا رصيف في البلد كلها إلا وفي طرفه منحدر حتى يستطيع كبار السن ومستخدمي الكراسي المتحركة الصعود والنزول من عليه .. لكن ده مش موضوعنا، المهم بقى إن أول إمبارح قرروا يمدوا كابلات في شارع قريب مني، الموضوع على بعضه ماخدش أكتر من تمانية وأربعين ساعة، لكن خلال الساعات القليلة ديه عملوا التالي:

ركبوا إشارة مرور متنقلة ببطارية عشان تنظم المرور في الشارع بعد لما بقى فردة واحدة
عملوا مسار جديد للمشاة عشان الرصيف عليه إشغالات
وعشان المشاة حايطلعوا وينزلوا على الرصيف من نصه بسبب التحويلة ديه، ركبوا قطعة حديدة منحدرة في الرصيف مخصوص عشان لو حصل ووحد على كرسي بعجل عدي في الشارع ده على العشرين متر من الرصيف دول بالذات في خلال التمانية وأربعين ساعة دول مايلاقيش مشاكل في الطلوع والنزول من الرصيف
وعشان موقف الأتوبيس إتنقل حوالي خمسين متر أو أقل من مكانه، قاموا مركبين لوحة جديدة تدل الناس على الموقف المؤقت لمدة تمانية وأربعين ساعة فقط لا غير

ماعرفش لو حد منهم سمع إن عندنا فيه خمسين طفل ماتوا في حادثة قطر عشان الحكومة مكسلة تعملله صيانة  وتركب مزلقانات أتوماتيكية ممكن يعملوا إيه.
وفي الأخر يقول لك الغرب الكافر، ده إحنا أصلا إللى كفرة يا شيخ

الله يرحم بيرم التونسي والشيخ سيد درويش



٢٠١٢/١١/٠٣

سوني إريكسون إكسبيريا، مرة تانية

من كام شهر كتبت عن هاتف سوني إريكسون إكسبريا راي
الكلام ده كان التليفون لسة في أوله، لكن دلوقتي بعد إستعمالي ليه، رأيي إتغير تماما
بس مش هو بس، كمان التابلت السامسونج جالاكسي التاب الجيل الأول
الإثنين عار على البشرية
مشكلة الأندرويد إن السوفتوير غالبا مش بيبقى راكب على الهاردوير
التليفون دلوقتي كل يوم يصبحني ويمسيني إن الميموري ماليانة
مع إنه بدين أمه عنده كارت ميموري إكسترنال فاضي، لكنه تقول إيه في الأندرويد وطبعه الدني، مصر يحط شوية من التطبيقات على الكارت الداخلي وراسه وألف سيف ماينقلهومش للكارت التاني. طبعا ده عيب أندرويد، بس الغباء بقى في التليفونات الأندرويد إنها غالبا مش بتخليك تحدث السوفتوير لما سوفتوير جديد ينزل، قال إيه مش مناسب للهاردوير الموجود عندك، غلاسة كده
التابلت بقى بسلامته بيهنج أكتر ما بيشتغل ويقعد يتكرع كل لما تدوس على زرار وهو مهنج تحس إنه حايطرش في وشك بعد شوية
صحيح ناس كتير بتسب الدين لأبل بعد ستيف جوبز طيب الله ثراه، وصحيح ناس بتشكر في التليفون الجالكسي إس تلاتة، بس بيني وبينك، إل إتلسع من الشوربة ينفخ في الزبادي و شكلي كده تليفوني الجديد حايكون ماركة التفاحة